Mat 23 | PMA | STEP | Navong Iesu mul veah en teahu ten Eim Votut, selus min marmari vangi meatin keil ka min onen keil vit,

a 23:1 Mak 12:38-39; Luk 11:43,46; 20:45-46

Matthew 23

Iesu Sel Kat Tiser Keil ten Mengkatien ka Farasi Keil ^a

1 Navong Iesu mul veah en teahu ten Eim Votut, selus min marmari vangi meatin keil ka min onen keil vit, 2 “Tiser keil ten Mengkatien ka Farasi keil amul akur vulin Mosis keke avit kilea mengkatien keil onen Ahi min meatin keil. 3 Sakini, kami mihelong kat keil ka mihousil tounah vasi koa keil aviteni mivoumoni. Ka minalisungeintei sakien keil one, veni keil armusiltei asa koa amul avihisein meatin sav keil eni. 4 Keil aling kat mengkatien tameas houlu en eisilin meatin keil. Ka keil, erovattei avasan he avakataun keil avahusi.

5 “Koakeil enek, tounah vasi amumoni, amumonis avaleh meten meatin sav keil eni keke avahouhou en keil. Munak meatin sav keil apar kat titi bokis en hen koa selusien onen Ahi mul ien, koakeil enek amumon one memariso mok. ^{▼▼23:5 Siu keil koa avi meahos aling selusien tai ten Tus Votut mul en titi bokis keil. Evus, apar kati mul en vatie vuo he navong uva keke avahis musil mengkatien tai onen Mosis en Dut 6:8.} Munak meatin sav keil amumon kele eisin ome taveah, koakeil enek amumon ome tetaveah ramat. ^{▼▼23:5 Siu keil koa avi meahos amumon kele eisin ome tetaveah vasakin keil amundem kati keke amusil Ahi enges musil mengkatien tai onen Mosis en Nam 15:37-41.} 6 En mari anien keil ka en eim tahihiseien emun, keil alekan out tatondanien keil tetahos koa asak koe ven hetetamen keil. 7 En out tahul tounah ien, evati mok navong meatin keil aviten 'more' min keil ral min houhouen ka avise keil en 'hetetamen'.

8 “Ka kami, anahisetei kami en 'hetetamen' veni hetamen onami tas, ka kami vasi mivi time keil. 9 Ka minahisetei meatin etai en out netan en 'tata' veni Tata onami tas, kei enges koa ro en out nesa. 10 Ka tamun, anahisetei kami en 'tiser' veni tiser onami tas, kei vi Kristo. 11 Kei koa mul kataun kami sav suval vi eiloheh onami, kei hemai hehi houlu mok en kami. 12 Veni koakeil aling rendemien one vina nesa, Ahi heling keil iha netan, ka koakeil aling rendemien one vita netan, Ahi hehati lat ise.

13 “!Hetisa mok min kami tiser keil ten mengkatien ka Farasi keil koa mimusil kat Ahi en hilivemi enges! Ahi hesan mahien min kami veni miring koe sise onen meatin keil anahatei vesesal ven hiasuvien onen Ahi. Anatin, avaseini evati avoumon Ahi vahi asuv houlu one, kami emirovatei, ka miring koe meatin sav keil anoumontei. 14 ^{▼▼23:14 !Hetisa mok min kami tiser keil ten mengkatien ka Farasi keil koa mimusil kat Ahi en hilivemi enges! Ven metenan onami, milah tounah houlu ran vatina keil, ka en meten meatin keil mimul mimumon hisien tetaveah. !Hesakini Ahi hesa mahien hetisa mok heha kat kami!}

15 “!Hetisa mok min kami tiser keil ten mengkatien ka Farasis keil koa mimusil kat Ahi en hilivemi enges! Ahi hesan mahien min kami veni mika koteh atas ka atan keke mivahotin meatin tai ka mivahiles rendemien onen vousil kat kami. Ka navong kei viles musil kat hihiseien keil onami, kami mimumoni mai tisa revi mok mulin kami keke mal revi kei mun hekur mahien en ahang koa sakras vavus suval onami.

16 “!Hetisa mok min kami koa misak visi keke mivalamun meatin keil, avaseini mivi metovar keil! Mahien koa mihekuri hemariso mok veni mimul mivisein meatin keil mivit, 'Munak meatin mumon hatkatien onen en isen Eim Votut, hatkatien onen vi heisav enges. Ka munak mumon hatkatien onen en isen gol koa mul en Eim Votut, kei hehatimal hekeih en hatkatien onen.' 17 !Kami metovar keil, mivi vau! ?Koa kave houlu mok, gol ten Eim Votut vuo Eim Votut varei koa mul sakin gol enek vi votut? 18 Ka kami mivisein meatin keil emun mivit, 'Munak meatin mumon hatkatien onen en isen ahor ten sanien, hatkatien onen vi heisav enges. Ka munak mumon hatkatien onen en isen sanien koa alingi ien, kei hehatimal hekeih en hatkatien onen.' 19 !O kami koa metomi var! ?Koa kave houlu mok, sanien vuo ahor ten sanien koa mul sakin sanien enek mai vi votut? 20 Sakini, meatin koa mumon hatkatien onen en isen ahor ten sanien mul mumoni mun en isen tounah vasi koa mul ien. 21 Ka meatin koa mumon hatkatien onen en isen Eim Votut, kei mul mumoni en isen Ahi koa ro ien. 22 Ka meatin koa mumon hatkatien onen en isen out nesa, kei mumoni en isen vulin ten keihoen onen Ahi ka en isen kati onen kei koa mul ien.

23 “!Hetisa mok min kami tiser keil ten mengkatien ka Farasi keil koa mimusil kat Ahi en hilivemi enges! Ahi hesan mahien min kami veni milong kat titi mengkatien keil suval sakien koa misan taet ten titi ouai keil takukien min Ahi. Ka mengkatien keil koa houlu mok, suval mengkatien keil keke mivatie sakien ten maluen, enmahisien ka demkatien, kami mirlong kattei. Hetahos imok munak mihelong kat mengkatien koa houlu mok hetal min koakeil avi havivi mok emun. 24 !Avaseini mivi metovar, misak visi mivalamun meatin sav keil! Kami misev revi en oai mami keke mivarmuntei titi neno tai koa romutotei, ka mimea mirem vasi mari kamel tai koa tisa mok.

25 “!Hetisa mok min kami tiser keil ten mengkatien ka Farasi keil koa mimusil kat Ahi en hilivemi enges! Mahien onami hemariso mok veni moulien onami suval veioai ka velet onami koa mikas motein revi out hae enges. Ka uaen ka anien koa mul en keilu, mikuri en sakien ten keihoen ka metenan. 26 !Kami mivi metovar varei! Helamu, mihekas motein neim en tounah keil en moulien onami. Hemukonek, out hae emun hetolas.

27 “!Hetisa mok min kami tiser keil ten mengkatien ka Farasi keil koa mimusil kat Ahi en hilivemi enges! Kami misuval tehitan keil koa amum revi ka akasi en oai taoh. Out hae, alesi tahos, ka out neim vilelau en sin meatin ka tounah sav keil koa tisa vis tisa mok. 28 En vati sakien enek, mimal revi en hilivemi enges, ka en tinomi neim, mivilelau en liluvosien ka tisaen.

29 “!Hetisa mok min kami tiser keil ten mengkatien ka Farasi keil koa mimusil kat Ahi en hilivemi enges! Mahien onami hemariso mok veni mimum revi tehitan keil onen provet keil ka mimosan en tehitan onen koakeil amal. 30 Ka mimul miviteni mivit, 'Munak komai mevato en avong onen avu onomai keil telamu, komai mevarlah ruaitei vatal min keil navong amu vini provet keil.' 31 Ekek, ral min selusien kati onami, miviteni anatin keke mivi vatiamal kati onen koakeil amu vini provet keil. 32 Ka en avong keil onami, mihoum vasin asa koa avu onami keil telamu amum rohtoh eni.

33 “!Kami mivi tetal tisa keil! !Anatin, kami mivi vangi tetal tisa keil koa mimul mirili vini meatin keil en ongomi! ??Mihelohosai ran mahien ten ahang koa sakras vavus hemukave?? !Mihesakras! 34 Sakini nasila provet keil, koakeil akileile, ka tiser keil iha ven kami keke isel kat kami mivahiles ran tisaen onami. Ka kami, keil koan, mihouas keil imat ka koan, miheti kat keil en aiveave. Ka keil koan emun, mihetah keil en viau takan en eim tahihiseien keil onami. Mihelikat keil keke mihehuli kat keil en taon keil onami ka en taon tateisav keil emun. 35 Hesakini, mahien ven matien onen meatin vasi keil koa amal en meten Ahi hel en hemi. Anatin, matien onen Ebel koa mal koa avu onami amu rohtoh eni rokol matien onen Sakaraea, natin Berekae, koa avu onami akov vini luhu en Eim Votut ka ahor ten sanien teni, matien vasi one heha kat kami. 36 Anatin eli naviteni min kami, Ahi hesan mahien ven matien keil vasi enek heha kat kami ten kosa.

37 “!O meatin keil ten out Serusalem! Kami, mimu vini provet keil ka mikov vini eiloheh keil koa Ahi sila keil umai ven kami. Avong houlu, ekvati mok mahise ruain kami ka mating koe kami vasuval toahin tai mul vise ruain titan keil ka ring koe keil en apouen. Ka kami emirovattei. 38 !Sakini mihelesi! Ahi herting koetei mun kami vuo taon onami, hesakini hemai hehi out volvol. 39 Ka naviteni min kami, kosa heha, miherlestei mun inau hetokol avong koa kami mihehiteni mihehit,'!Tokolkatien mul en kei koa mai en isen Iahova!'”(Sam 118:26)

Matthew 23

Iesu Sel Kat Tiser Keil ten Mengkatien ka Farasi Keil a

Iesu Sel Kat Tiser Keil ten Mengkatien ka Farasi Keil ^a